ओमकार गांजुरे
तालुका प्रतिनिधी,उदगीर
उदगीर येथील लालबहादूर शास्त्री माध्यमिक विद्यालय मागच्या 40 वर्षापासून अखंडितपणे मराठवाडा पातळीवरील लालबहादूर शास्त्रीजींच्या स्मरणार्थ आंतरशालेय वाद-विवाद स्पर्धेचे आयोजन करते.दरवर्षीप्रमाणे या ही वर्षी स्पर्धेचे आयोजन करण्यात आले आहे.या वर्षी ही स्पर्धा कोरोना प्रादुर्भावामुळेऑनलाइन पद्धतीने घेण्यात येणार आहे.हे स्पर्धेचं 41वे वर्ष आहे.स्पर्धा दिनांक 01व 02 ऑक्टोबर 2020 रोजी संपन्न होणार आहे.51 हजार रूपयांची भव्य पारितोषिके असलेली ही स्पर्धा इयत्ता 7वी ते 10वी च्या विद्यार्थ्यांसाठी आहे. या स्पर्धेत एक स्पर्धकांने विषयाच्या अनुकूल बाजूने व दुसऱ्या स्पर्धकाने विषयाच्या प्रतिकूल बाजूने विषय मांडणी करणे बंधनकारक आहे.या स्पर्धेचा विषय “ऑनलाईन शिक्षणपद्धती:शिक्षणासाठी तारक की मारक” हा आहे.वादविवाद स्पर्धेच्या माहितीपत्रकाचं विमोचन स्थानिक कार्यवाह शंकरराव लासुने व मुख्याध्यापक प्रदीपराव कुलकर्णी यांच्या हस्ते करण्यात आले.याप्रंसगी या स्पर्धेमध्ये जास्तीत जास्त शाळेच्या संघांनी आपला सहभाग नोंदवावा असे आवाहन मुख्याध्यापक प्रदीप कुलकर्णी , स्पर्धा प्रमुख निता मोरे , सहप्रमुख श्रीपाद सन्मुखे यांनी केले आहे.माहितीपत्रकाच्या विमोचनप्रसंगी पर्यवेक्षक,अंबूताई दीक्षित ,लालासाहेब गुळभिले,अंबादास गायकवाड ,माधव मठवाले,अनिता यलमटे ,रामेश्वर मलशेट्टे व गुरूदत्त महामुनी उपस्थित होते.